മിഷനറിമാർ ക്രിസ്തുവിന് സാക്ഷികളാകാൻ വിളിക്കപ്പെട്ടവരാണെന്നും യഥാർത്ഥ മിഷനറിയുടെ ദൗത്യം മനഃപരിവർത്തനം ആണെന്നും ഉദ്ബോധിപ്പിച്ച് സീറോ മലബാർ സഭ മേജർ ആർച്ച് ബിഷപ് മാർ ജോർജ് ആലഞ്ചേരി.
ആരംഭ കാലഘട്ടങ്ങളിൽ ദരിദ്രരും അവഗണിക്കപ്പെട്ടവരുമായവർക്ക് കൈത്താങ്ങായി നിന്ന മിഷനറിമാർ പിന്നീടു സംസ്കാരിക മൂല്യങ്ങളെ കൈവിടാതെ സഭയുടെ മിഷൻ പ്രവർത്തനം വ്യത്യസ്ത മേഖലകളിൽ തുടർന്നുവെന്നതും കർദിനാൾ ചൂണ്ടിക്കാട്ടി.
റൂഹാലയ തിയോളജി മേജർ സെമിനാരി പ്രേഷിതോന്മുഖമായ ദൈവശാസ്ത്ര പരിശീലനം എന്ന വിഷയത്തെ ആസ്പദമാക്കി സംഘടിപ്പിച്ച അഖിലേന്ത്യാ സിംപോസിയത്തിന്‍റെ സമാപന സമ്മേളനത്തിൽ സംസാരിക്കുകയായിരുന്നു മാർ ആലഞ്ചേരി. ഓൺലൈനായി നടത്തിയ അഞ്ചു ദിവസത്തെ സമ്മേളനം തലശേരി ആർച്ച്ബിഷപ് മാർ ജോസഫ് പാംപ്ലാനിയാണ് ഉദ്ഘാടനം ചെയ്തത്.
സെന്‍റ് തോമസ് മിഷനറി സൊസൈറ്റിയുടെ കീഴിൽ ഉജ്ജൈനിൽ ഉള്ള റൂഹാലയ സെമിനാരിയുടെ ദൈവശാസ്ത്ര വിഭാഗത്തിന്‍റെ രജത ജൂബിലിയുടെ ഭാഗമായാണ് സിംപോസിയം സംഘടിപ്പിച്ചത്. റവ. ഡോ . ജോസ് പാലക്കീൽ ആയിരുന്നു മുഖ്യ സംഘാടകൻ. ഇന്ത്യയിലെ വിവിധ മേജർ സെമിനാരികളിൽ നിന്നുള്ള ഇരുപത് ബൈബിൾ പണ്ഡിതരും ദൈവശാസ്ത്രജ്ഞരും പ്രബന്ധങ്ങൾ അവതരിപ്പിച്ചു. സെമിനാരികളിലെ വൈദിക പരിശീലനം കാലാനുസൃതമാക്കാനുള്ള വിവിധ ആശയങ്ങളും പദ്ധതികളും ചർച്ച ചെയ്തു.
ഉജ്ജൈൻ രൂപതാധ്യക്ഷൻ മാർ സെബാസ്റ്റ്യൻ വടക്കേൽ, സാഗർ രൂപതാധ്യക്ഷൻ മാർ ജെയിംസ് അത്തിക്കളം, ഇൻഡോർ രൂപതാധ്യക്ഷൻ മാർ ചാക്കോ തോട്ടുമാരിക്കൽ എന്നിവരും പങ്കെടുത്തു.
ക്രൈസ്തവ ലോകത്തെ പുതുപുത്തൻ വാർത്തകൾ അറിയുന്നതിനായി വാട്സാപ്പ് ഗ്രൂപ്പുകളിലേക്ക് സ്വാഗതം
Follow this link to join our WhatsAppgroup
ക്രൈസ്തവ ലോകത്തെ പുതുപുത്തൻ വാർത്തകൾ അറിയുന്നതിനായി ടെലഗ്രാം ഗ്രൂപ്പിലേക്ക് സ്വാഗതം
Follow this link to join our Telegram group
