ഈശോയുടെ തിരുഹൃദയത്തിനും പരിശുദ്ധ അമ്മയുടെ വിമല ഹൃദയത്തിനും കുടുംബത്തെ സമർപ്പിച്ചു കൊണ്ടുള്ള പ്രാർത്ഥന…

ഈശോയുടെയും പരിശുദ്ധ അമ്മയുടെയും ഏറ്റവും വിശുദ്ധമായ തിരുഹൃദയമേ,ഏറ്റവും ഉദാത്തമായ സ്നേഹത്താൽ ഒന്നായിരുന്ന തിരുഹൃദയമേ, ഞങ്ങളെ ദയവോടെയും സ്നേഹത്തോടെയും നോക്കേണമേ. ഞങ്ങളെയും ഞങ്ങളുടെ കുടുംബങ്ങളെയും ഈശോയുടെയും പരിശുദ്ധ അമ്മയുടെയും തിരുഹൃദയത്തിന് പ്രത്യേകമായി സമർപ്പിക്കുന്നു.നസ്രത്തിലെ തിരുക്കുടുംബമാണ് ഞങ്ങൾക്കു മുന്നിലുള്ള ഏറ്റവും മനോഹരവും അർത്ഥവത്തുമായ മാതൃക. അവിടുത്തെ സ്നേഹവും കരുണയും സഹായവുമുണ്ടെങ്കിൽ ഞങ്ങളുടെ കുടുംബവും തിരുക്കുടുംബം പോലെയാകും. സ്നേഹം, ക്ഷമ, സഹിഷ്ണുത, പരസ്പര ബഹുമാനം, ആത്മാർത്ഥത, സന്തോഷം എന്നിവയാൽ ഞങ്ങളുടെ ഭവനം നിറയട്ടെ. ഞങ്ങളുടെ പ്രാർത്ഥനകളിൽ മറ്റുള്ളവരുടെ ആവശ്യങ്ങൾ കൂടി ഉൾപ്പെടുത്തുവാൻ ഞങ്ങൾക്ക് സാധിക്കട്ടെ.

ഞങ്ങൾക്ക് എപ്പോഴും ദിവ്യകാരുണ്യത്തോട് ചേർന്നു നിൽക്കുവാൻ സാധിക്കട്ടെ. ഇപ്പോൾ ഇവിടെ സന്നിഹിതരായിരിക്കുന്നവരെയും അല്ലാത്തവരെയും അനുഗ്രഹിക്കേണമേ. മരണം മൂലം ഞങ്ങളിൽ നിന്ന് വേർപിരിഞ്ഞു പോയ എല്ലാവരെയും സമാധാനത്തിൽ വിശ്രമിക്കുവാൻ അനുഗ്രഹം നൽകേണമേ. ഞങ്ങൾ പരീക്ഷണങ്ങൾക്ക് വിധേയരാകുമ്പോൾ ദൈവഹിതത്തോടൊപ്പം തന്നെ ഞങ്ങളുടെ ബലഹീനതയെയും വിശ്വാസത്തെയും കൂടി പരിഗണിക്കേണമേ. പരിശുദ്ധ അമ്മയുടെയും ഈശോയുടെയും തിരുഹൃദയങ്ങളോട് ഞങ്ങളെയും ഞങ്ങളുടെ കുടുംബത്തെയും ചേർത്തു പിടിക്കേണമേ.

തിരുഹൃദയത്തിന്റെ സംരക്ഷണം കൊണ്ട് എപ്പോഴും ഞങ്ങളെ പൊതിഞ്ഞു പിടിക്കേണമേ. ഈശോയുടെയും പരിശുദ്ധ കന്യകാമറിയത്തിന്റെയും തിരുഹൃദയങ്ങളേ, ഞങ്ങളുടെ പ്രാർത്ഥന കേൾക്കേണമേ. ആമേൻ…

ക്രൈസ്തവ ലോകത്തെ പുതുപുത്തൻ വാർത്തകൾ അറിയുന്നതിനായി വാട്സാപ്പ് ഗ്രൂപ്പുകളിലേക്ക് സ്വാഗതം ‍
Follow this link to join our WhatsAppgroup

ക്രൈസ്തവ ലോകത്തെ പുതുപുത്തൻ വാർത്തകൾ അറിയുന്നതിനായി ടെലഗ്രാം ഗ്രൂപ്പിലേക്ക് സ്വാഗതം
Follow this link to join our Telegram group