വിശുദ്ധ മറിയം ത്രേസ്യയുടെ തിരുനാൾ ആഘോഷം കുഴിക്കാട്ടുശ്ശേരി വിശുദ്ധ മറിയം ത്രേസ്യ – ധന്യൻ ഫാ. ജോസഫ് വിതയത്തിൽ തീർഥാടന കേന്ദ്രത്തിൽ നാളെ നടക്കും.
തിരുനാൾ ദിനമായ നാളെ രാവിലെ 9.30നുള്ള ആഘോഷമായ തിരുനാൾ കുർബാനയ്ക്ക് ഇരിങ്ങാലക്കുട രൂപത ബിഷപ് മാർ പോളി കണ്ണൂക്കാടൻ മുഖ്യകാർമ്മികനാകും. ഉച്ചതിരിഞ്ഞ് മൂന്നിനുള്ള ദിവ്യബലിയെ തുടർന്ന് അലംകൃതമായ വീഥിയിലൂടെ വാദ്യഘോഷങ്ങളുടെയും പ്രാർത്ഥനാമഞ്ജരികളുടെയും അകമ്പടിയിൽ വിശുദ്ധയുടെ തിരുശേഷിപ്പും വഹിച്ചു കൊണ്ടു തിരുനാൾ പ്രദക്ഷിണം. തുടർന്നു തിരുശേഷിപ്പ് വണക്കം.
തീർഥാടന കേന്ദ്രത്തിൽ രാവിലെ ആറു മുതൽ രാത്രി ഏഴുവരെ വിശുദ്ധ കുർബാനകൾ. ഊട്ടുനേർച്ച ഭക്ഷണത്തിന്റെ ആശീർവാദം രാവിലെ 8.30 ന് മുൻ അപ്പസ്തോലിക് നുൺഷ്യോ ആർച്ച്ബിഷപ് മാർ ജോർജ് പാനികുളം നിർവഹിക്കും. തുടർന്ന് രാത്രി ഏഴുവരെ ഊട്ട് നേർച്ച വിതരണം. എട്ടാമിട തിരുനാൾ ദിനമായ 15 ന് രാവിലെ 10 ന് തിരുനാൾ ദിവ്യബലി. തുടർന്നു പ്രദക്ഷിണം, തിരുശേഷിപ്പു വണക്കം.
ഇന്നലെ നടന്ന നവനാൾ തിരുക്കർമ്മങ്ങളിൽ തലശ്ശേരി അതിരൂപത ആർച്ച് ബിഷപ് എമരിറ്റസ് മാർ ജോർജ് ഞരളക്കാട്ട് മുഖ്യകാർമ്മികനായിരുന്നു. ഇന്നു വൈകീട്ട് അഞ്ചിനു നടക്കുന്ന നവനാൾ തിരുക്കർമ്മങ്ങളിൽ കൊല്ലം ബിഷപ് എമരിറ്റസ് ഡോ. സ്റ്റാൻലി റോമൻ മുഖ്യകാർമ്മികനാകും.
തിരുനാളിനുള്ള ഒരുക്കങ്ങൾ പൂർത്തിയായതായി ചെയർമാനും ഇരിങ്ങാലക്കുട രൂപത വികാരി ജനറാളുമായ മോൺ. ജോസ് മഞ്ഞളി, ഹോളി ഫാമിലി സന്യാസിനീ സമൂഹത്തിന്റെ സുപ്പീരിയർ ജനറൽ മദർ ആനി കുര്യാക്കോസ്, റെക്ടർ ഫാ. ജോൺ കവലക്കാട്ട്, പ്രമോട്ടർ ഫാ. സെബാസ്റ്റ്യൻ അരിക്കാട്ട്, അഡ്മിനിസ്ട്രേറ്ററും ജനറൽ കൺവീനറുമായ സിസ്റ്റർ എൽസി സേവ്യർ, ജനറൽ കൺവീനർ പി.ടി. ജോസ്, വൈസ് പോസ്റ്റുലേറ്റർ സിസ്റ്റർ റോസ്മിൻ മാത്യു എന്നിവർ അറിയിച്ചു.
ക്രൈസ്തവ ലോകത്തെ പുതുപുത്തൻ വാർത്തകൾ അറിയുന്നതിനായി വാട്സാപ്പ് ഗ്രൂപ്പുകളിലേക്ക് സ്വാഗതം
Follow this link to join our WhatsAppgroup
ക്രൈസ്തവ ലോകത്തെ പുതുപുത്തൻ വാർത്തകൾ അറിയുന്നതിനായി ടെലഗ്രാം ഗ്രൂപ്പിലേക്ക് സ്വാഗതം
Follow this link to join our Telegram group