marianvibes

വിധിക്കുന്നതിന് മുൻപ് ഹൃദയപൂർവം മനസ്സിലാക്കാൻ ശ്രമിക്കുന്നവരാകണം നീതിപാലകരെന്ന് ആർച്ച് ബിഷപ്പ് മാർ മാത്യു മൂലക്കാട്ട്. 

സീറോമലബാർ സഭയിലെ മേജർ ആർക്കി എപ്പിസ്കോപ്പൽ ട്രൈബ്യൂണൽ ജഡ്‌ജിമാരുടെയും, നീതി സംരക്ഷകരുടെയും, രൂപതകളിലെ ജുഡീഷൽ വികാരിമാരുടെയും സംയുക്ത സമ്മേളനം സഭാ ആസ്ഥാനമായ മൗണ്ട് സെന്റ് തോമസിൽ ഉദ്ഘാടനം ചെയ്തു സംസാരിക്കുകയായിരുന്നു സഭയുടെ നീതി നിർവഹണ വിഭാഗത്തിൻ്റെ മോഡറേറ്ററായ മാർ മൂലക്കാട്ട്. 

മനുഷ്യന്റെ അന്തസ്സ് ഉയർത്തിപ്പിടിക്കുന്നതിനും കൂദാശകളുടെ പരിശുദ്ധി സംരക്ഷിക്കുന്നതിനും ദൈവത്തിന്റെ കാര്യണ്യം മനുഷ്യൻറെ ബലഹീനതയാൽ മറയ്ക്കപ്പെടുന്നില്ലെന്ന് ഉറപ്പാക്കുന്നതിനും ഉതകുന്നതാകണം സഭയിലെ നീതിനിർവ്വഹണമെന്ന് അദ്ദേഹം ഓർമിപ്പിച്ചു. മുറിവുകളെ സൗഖ്യമാക്കാനും വിഭജിക്കപ്പെട്ടതിനെ അനുരഞ്ജിപ്പിക്കാനും ആശയക്കുഴപ്പമുള്ളിടത്ത് വ്യക്തത വരുത്താനും നിയമനിർവഹണം കൊണ്ട് സാധ്യമാകണം. അതിനാൽ, നിയമ വിദഗ്ധർ സത്യവും നീതിയും സ്നേഹവും കാരുണ്യവും ഉറപ്പാക്കുന്ന ഇടയ ശുശ്രൂഷകരാകണമെന്നും അദ്ദേഹം കൂട്ടിച്ചേർത്തു,

ആധുനിക ലോകത്തിൽ സഭാ ട്രൈബ്യൂണലുകൾ അഭിമുഖീകരിക്കുന്ന വ്യത്യസ്‌തങ്ങളായ പ്രശ്ന‌ങ്ങളെ യോഗം വിലയിരുത്തുകയും പരിഹാരമാർഗങ്ങൾ നിർദ്ദേശിക്കുകയും ചെയ്‌തു. മേജർ ആർക്കി എപ്പിസ്കോപ്പിൽ ട്രൈബ്യൂണലിന്റെ ജഡ്‌ജിയായും വൈസ് പ്രസിഡന്റായും പ്രസിഡന്റായും സേവനം ചെയ്ത റവ. ഡോ. തോമസ് ആദോപ്പിള്ളിക്ക് കൃതജ്ഞതയർപ്പിച്ചുകൊണ്ട് കൂരിയ ബിഷപ്പ് മാർ സെബാ സ്റ്റ്യൻ വാണിയപ്പുരയ്ക്കൽ സംസാരിച്ചു. ട്രൈബ്യൂണൽ പ്രസിഡണ്ട് റവ. ഡോ. ഫ്രാൻസിസ് എലുവത്തിങ്കൽ സ്വാഗതവും വൈസ് പ്രസിഡണ്ട് റവ. ഡോ. ജോസഫ് മുകളെപറമ്പിൽ കൃതജ്ഞതയും പ്രകാശിപ്പിച്ചു. റവ. ഡോ. തോമസ് തെങ്ങുംപള്ളി, റവ. ഡോ. സെബാസ്റ്റ്യൻ മുട്ടംതൊട്ടിൽ എം.സി.ബി.എസ്., സി. ജിഷ ജോബ് എം.എസ്.എം.ഐ. എന്നിവർ സമ്മേളനത്തിന് നേതൃത്യം നൽകി.

ക്രൈസ്തവ ലോകത്തെ പുതുപുത്തൻ വാർത്തകളും വിശേഷങ്ങളും അറിയുവാൻ മരിയൻ വൈബ്സ് ന്യൂസ് പോർട്ടലിന്റെ ഏറ്റവും പുതിയ വാട്സ്ആപ്പ് ചാനൽ സബ്സ്ക്രൈബ് ചെയ്യുക....

????????????????????????????????????????????????
https://whatsapp.com/channel/0029VaELOKJId7nMsgAl330m