ആശുപത്രി സ്യൂട്ട് ചാപ്പലില്‍ പ്രാ‌ര്‍ത്ഥനയോടെ; ഒരു മാസത്തെ ആശുപത്രി വാസത്തിനിടെ മാര്‍പാപ്പയുടെ ആദ്യ ചിത്രം പുറത്തുവിട്ട് വത്തിക്കാൻ

ശ്വാസകോശ അണുബാധയെത്തുടർന്ന് ഒരു മാസം മുൻപ് ആശുപത്രിയില്‍ പ്രവേശിപ്പിച്ചതിനു ശേഷമുള്ള മാർപ്പാപ്പയുടെ ആദ്യ ഫോട്ടോ വത്തിക്കാൻ ഞായറാഴ്ച പുറത്തിറക്കി.

“ഇന്ന് രാവിലെ ജെമെല്ലി പോളിക്ലിനിക്കിന്റെ പത്താം നിലയിലുള്ള അപ്പാർട്ട്മെന്റിലെ ചാപ്പലില്‍ ഫ്രാൻസിസ് മാർപാപ്പ വിശുദ്ധ കുർബാന അർപ്പിച്ചു,” എന്ന് വത്തിക്കാൻ പ്രസ് ഓഫീസ് ഫോട്ടോയുടെ അടിക്കുറിപ്പില്‍ എഴുതി. ചിത്രത്തില്‍ ഫ്രാൻസിസ് മാർപ്പാപ്പ പർപ്പിള്‍ നിറത്തിലുള്ള നോമ്പുകാല ആരാധനാക്രമ വസ്ത്രം ധരിച്ച്‌ ആശുപത്രി ചാപ്പലിലെ ഒരു അള്‍ത്താരയ്ക്ക് മുന്നില്‍ വീല്‍ചെയറില്‍ ഇരിക്കുന്നത് കാണാം.

ഫെബ്രുവരി 14 ന് ഗുരുതരമായ ബ്രോങ്കൈറ്റിസ് ബാധിച്ച്‌ ആശുപത്രിയില്‍ പ്രവേശിപ്പിച്ചതിനു ശേഷമുള്ള പോപ്പിന്റെ ആദ്യ ഫോട്ടോയാണിത്. ഫോട്ടോയില്‍ മറ്റാരെയും കാണുന്നില്ല. ഒട്ടേറെ കുട്ടികളും പേപ്പല്‍ പതാകകളുമായി ആശുപത്രിക്കു മുന്നിലെത്തിയിരുന്നു. തന്റെ സൗഖ്യത്തിനായി ഒരുപാടു കുട്ടികള്‍ പ്രാർഥിക്കുന്നുണ്ടെന്നും ആശുപത്രിക്കു മുന്നില്‍ അവരെത്തിയത് തന്നോടുള്ള അടുപ്പത്തിന്റെ അടയാളമാണെന്നും മാർപാപ്പ ഞായറാഴ്ച സന്ദേശത്തില്‍ അനുസ്മരിച്ചു.

പോപ്പിന്റെ നില ഗുരുതരമോ ജീവന് ഭീഷണിയോ അല്ലെന്ന് ഈ ആഴ്ച ഡോക്ടർമാർ പറഞ്ഞിരുന്നു, എന്നാല്‍ പ്രായം, ചലനശേഷിയില്ലായ്മ, ചെറുപ്പത്തില്‍ ശ്വാസകോശത്തിന്റെ ഒരു ഭാഗം നഷ്ടപ്പെട്ടത് എന്നിവ കാരണം അദ്ദേഹത്തിന്റെ അവസ്ഥ സങ്കീർണ്ണമായി തുടരുന്നുവെന്ന് അവർ പറയുന്നു. ഓക്സിജൻ തെറപ്പി തുടരുന്നുണ്ട്. രാത്രി വെന്റിലേറ്റർ ഉപയോഗിക്കുന്നത് കുറച്ചു. ഈ ആഴ്ച നടത്തിയ എക്സ്-റേ പരിശോധനയില്‍ അണുബാധ മാറുന്നതായി സ്ഥിരീകരിച്ചു. അടുത്ത അപ്‌ഡേറ്റ് ആഴ്ചയുടെ മധ്യത്തോടെ മാത്രമേ പുറത്തുവിടുകയുള്ളൂവെന്ന് വത്തിക്കാൻ അറിയിച്ചു.

ക്രൈസ്തവ ലോകത്തെ പുതുപുത്തൻ വാർത്തകൾ അറിയുന്നതിനായി വാട്സാപ്പ്,ടെലഗ്രാം ഗ്രൂപ്പുകളിലേക്ക് സ്വാഗതം ‍                                                                                    Follow this link to join  WhatsApp group
https://chat.whatsapp.com/FuxH3GIGJOZLwdy1V4FA8J

Follow this link to join Telegram group
https://t.me/joinchat/20BbDWgnkcBmMWI0