കുടുംബ വർഷാചരണത്തിന്‍റെ ഭാഗമായി കെആർഎൽസിബിസി ഫാമിലി കമ്മീഷന്‍റെ നേതൃത്വത്തിൽ 12 ലത്തീൻ രൂപതകളിൽ നിന്നുള്ള കുടുംബങ്ങൾ ഒത്തുചേരുന്ന ഫമീലിയ മീറ്റ് – കുടുംബസംഗമവും കണ്‍വെൻഷനും ഇന്നും നാളെയുമായി നടക്കും.
അർത്തുങ്കൽ സെന്‍റ് ആൻഡ്രൂസ് ബസിലിക്കയിൽ ഇന്നു വൈകുന്നേരം അഞ്ചിന് വിവിധ രൂപതകളിൽ നിന്ന് എത്തിച്ചേരുന്ന കുടുംബങ്ങൾ ആലപ്പുഴ, കൊച്ചി രൂപതകളിലെ വിവിധ കുടുംബങ്ങളിൽ ഒത്തുചേരും. നാളെ രാവിലെ 8.30ന് തെരഞ്ഞടുക്കപ്പെട്ട 1500 കുടുംബങ്ങളും കുടുംബശുശ്രൂഷാ പ്രവർത്തകരും ഒത്തുചേരും.
രാവിലെ ഒന്പതിന് കെആർഎൽസിബിസി ചെയർമാൻ ബിഷപ് ഡോ. ജോസഫ് കാരിക്കശേരിയുടെ അധ്യക്ഷതയിൽ ചേരുന്ന സമ്മേളനം കെസിബിസി ഫാമിലി കമ്മീഷൻ ചെയർമാൻ ബിഷപ് ഡോ. പോൾ ആൻറണി മുല്ലശേരി ഉദ്ഘാടനം ചെയ്യും. മുൻ ഡിജിപി ഡോ. അലക്സാണ്ടർ ജേക്കബ് മുഖ്യപ്രഭാഷണം നടത്തും.
രൂപതാധ്യക്ഷൻമാരുടെ നേതൃത്വത്തിൽ നടക്കുന്ന ദിവ്യബലിക്ക് തിരുവനന്തപുരം ആർച്ച് ബിഷപ്പ് ഡോ. തോമസ് ജെ. നെറ്റോ മുഖ്യകാർമികത്വം വഹിക്കും. കോഴിക്കോട് ബിഷപ്പ് ഡോ. വർഗീസ് ചക്കാലയ്ക്കൽ വചന സന്ദേശം നൽകും.
ഫ്രാൻസിസ് മാർപ്പാപ്പയുടെ കുടുബങ്ങൾക്കു വേണ്ടിയുള്ള അപ്പസ്തോലിക ലേഖനമായ അമോരീസ് ലത്തീസ്യയെ അടിസ്ഥാനമാക്കി മാതാപിതാക്കൾക്കായി ആലപ്പുഴ ബിഷപ് ഡോ. ജെയിംസ് റാഫേൽ ആനാപറന്പിൽ പ്രഭാഷണം നടത്തും. യുവജനങ്ങൾക്കായി ബൈജു നയിക്കുന്ന കണ്‍വെൻഷൻ കെസിബിസി യുവജന കമ്മീഷൻ ചെയർമാൻ ബിഷപ് ഡോ. ആർ. ക്രിസ്തുദാസ് ഉദ്ഘാടനം ചെയ്യും.
കുട്ടികൾക്കായി ഗ്രീൻ പാസ്റ്റേഴ്സ് അംഗങ്ങളായ ഷാജിയും ജെൽസനും നയിക്കുന്ന കണ്‍വെൻഷൻ സുൽത്താൻപേട്ട് ബിഷപ് ഡോ. ആന്‍റണി സാമി പീറ്റർ അബിർ ഉദ്ഘാടനം ചെയ്യും. വൈകുന്നേരം മൂന്നിന് നടക്കുന്ന സമ്മേളനം ഗതാഗത മന്ത്രി ആന്‍റണി രാജു ഉദ്ഘാടനം ചെയ്യും. ബിഷപ് ഡോ. ജോസഫ് കരിയിൽ അധ്യക്ഷത വഹിക്കും.
ക്രൈസ്തവ ലോകത്തെ പുതുപുത്തൻ വാർത്തകൾ അറിയുന്നതിനായി വാട്സാപ്പ് ഗ്രൂപ്പുകളിലേക്ക് സ്വാഗതം
Follow this link to join our WhatsAppgroup
ക്രൈസ്തവ ലോകത്തെ പുതുപുത്തൻ വാർത്തകൾ അറിയുന്നതിനായി ടെലഗ്രാം ഗ്രൂപ്പിലേക്ക് സ്വാഗതം
Follow this link to join our Telegram group
